إزاي ترتبي أكلات الأسبوع وتريحي دماغك من الحيرة اليومية؟

التفكير في الأكل بيتعب أكتر من الطبيخ نفسه!

يا ست الكل، إحنا كستات بيوت أكتر حاجة بتسحب طاقتنا مش وقفة المطبخ ولا غسيل المواعين، لكن التفكير اليومي في "يا ترى هعمل غدا إيه النهاردة؟". وتدخلي تسألي الولاد أو جوزك تلاقيهم بيقولولك "أي حاجة!"، ودي الكلمة اللي بترفع الضغط وتخليكي مش عارفة تبدأي منين! المطبخ بالنسبة لينا مش مجرد مكان بنعمل فيه أكل، ده مملكتنا اللي بنقضي فيها نص يومنا، وعشان كده ترتيب وجبات الأسبوع مسبقاً هو السر اللي هيريح دماغك ويخليكي تبدأي يومك رايقة وعندك وقت تشوفي نفسك وتشوفي وراكي إيه تاني.

خطوات عملية عشان ترتبي أسبوعك صح

عشان تخلصي من المشكلة دي نهائياً، لازم تمشي على خطة بسيطة متخرش المية، خليكي معايا خطوة خطوة:

• بصي في تلاجتك الأول (جرد التلاجة): قبل ما تكتبي أي منيو أو تفكري في أكلات جديدة، افتحي التلاجة والفريزر ودولاب المطبخ وشوفي إيه اللي عندك. عندك ربع كيلو لحمة مفرومة مركون؟ يبقي هنعمل بيه صينية مكرونة أو كفتة رز. عندك كيس بسلة؟ يبقى نعملها. استغلي اللي موجود عشان متصرفيش كتير وتقللي من هدر الأكل اللي بيترمي.
• نوّعي في الأكل وماتكرريش: خلي الأسبوع بتاعك متوازن عشان الولاد ميزهقوش. قسمي الأسبوع: يومين لحوم وفراخ، يوم سمك أو تونة، ويومين أكل شعبي واقتصادي زي الكشري أو المسقعة بالخل والتوم، ويوم أكل سريع زي البانيه والمكرونة، واليوم السابع خليه بواقي الأكل اللي في التلاجة عشان ترتاحي من الطبيخ تماماً.
• ورقة وقلم أو التكنولوجيا: زمان كنا بنمسك ورقة وقلم ونشطب ونكتب ونرجع نقطع الورقة ونعيد، دلوقتي تطبيق منيو البيت بيخليكي تختاري الأكلات وتترتب قدامك في الجدول أوتوماتيك، والموضوع مبيكملش 5 دقايق وانتي قاعدة بتشربي النسكافيه بتاعك الصبح.
• اكتبي طلباتك مرة واحدة في الأسبوع: لما ترتبي منيو الأسبوع كله، هتبقي عارفة بالظبط إنتي محتاجة إيه من السوبر ماركت أو بتاع الخضار. فمش هتنزلي تشتري كل يوم وتضيعي وقتك ومجهودك، غير إن النزول اليومي بيخليكي تصرفي فلوس في حاجات ملهاش لازمة.

تجهيزات يوم الإجازة (سر الراحة)

بعد ما حددتي المنيو واشتريتي طلباتك، خدي ساعتين بس في يوم الإجازة جهزي فيهم أساسيات الأكل. قطعي بصل وافرميه وحطيه في علبة في الفريزر، اسلقي الفراخ أو اللحمة، اغسلي الخضرة وقطعيها. الساعتين دول هيوفرولك وقفة كل يوم في المطبخ، ولما تيجي تطبخي مش هتاخدي أكتر من نص ساعة وتلاقي الغدا على السفرة.

إزاي منيو البيت هيشيل عنك الشيلة؟

بمجرد ما تفتحي التطبيق، هتلاقي أفكار لوجبات كتير جداً متقسمة (فراخ، لحمة، شعبي، اقتصادي). اختاري اللي يعجبك والتطبيق هيعملك قائمة مشتريات فيها كل المقادير اللي هتحتاجيها وتنزلي تشتريها. والأحلى من كدا، إنه بيفكرك بالليل عن طريق إشعار على الموبايل تطلعي اللحمة أو الفراخ تفك عشان تقومي الصبح تلاقي كل حاجة جاهزة على الطبيخ. ريحي دماغك وجربيه، صدقيني هيفرق في حياتك جداً!