مشتريات الشهر.. تجيبي إيه بالجملة وإيه بالقطاعي عشان توفري؟

الميزانية بتطير في السوبر ماركت

السر في التوفير مش إنك تحرمي بيتك، السر في "الذكاء في الشراء". لو نزلتي السوبر ماركت من غير ورقة طلبات (أو من غير ما تستخدمي قائمة المشتريات في تطبيق منيو البيت)، هتلاقي نفسك بتشتري عروض على حاجات مش محتاجاها، وبتنسي الأساسيات. في حاجات لو جبتيها بالجملة هتوفرلك مبالغ محترمة، وحاجات تانية الجملة فيها خسارة لأنها بتبوظ.

إيه اللي تشتريه بالشهر (كميات كبيرة)؟

• النشويات والبقوليات: الرز، المكرونة، الدقيق، السكر، العدس، الفول. الحاجات دي عمرها طويل جداً ومش بتبوظ لو اتخزنت صح. هاتيها شكاير أو أكياس كبيرة، سعر الكيلو فيها بيقف أرخص بكتير من الأكياس الصغيرة المغلفة.
• المنظفات الورقية والصابون: مناديل التواليت، مناديل المطبخ، صابون المواعين، مسحوق الغسيل. دي أكتر حاجات بتسحب فلوس ومبتنتهيش صلاحيتها. هاتي العبوات العائلية الجركن أو الشكاير هتوفر معاكي النص تقريباً.
• اللحوم والفراخ: هاتي حاجتك من اللحوم مرة واحدة أول الشهر، قسميها في أكياس على قد الوجبة وتبليها وشيليها. ده هيوفر مشاوير، وهيخليكي تلتزمي بجدول الأكل وماتجيبيش تيك أواي بحجة "لسه هنزل أشتري فراخ".

إيه اللي تشتريه بالأسبوع (قطاعي)؟

الخضار والفاكهة الطازة! أكبر غلطة إنك تشتري خضار بفلوس كتير أول الشهر، وتيجي آخر الأسبوع تلاقيه دبل وباظ في التلاجة وترميه. خصصي مبلغ أسبوعي صغير لسوق الخضار والفاكهة، هاتي على القد بالظبط.. ولو احتجتي تاني انزلي هاتي طازة. والجبن كمان هاتي كميات صغيرة عشان متبوظش في التلاجة إلا لو هتخزنيها في الفريزر.